ZORAM TODAY| Aizawl 7th June, 2024 (Fri): Vawiin khan Hnahthial Electric Veng Hall ah Hnahthial MZP Hqrs in Hnahthial district huapa HSLC leh HSSLC a zirlai tithate leh sikul 100% pass chinte chawimawina hun an hmang a. He hunah hian Pu Robert Romawia Royte, Hachhek bialtu MLA chu khuallian a ni.

Khuallian chuan thusawiin, "Zirna chu mitin tana pawimawh, mi tamtak dinhmun hniam atanga dinhmun sang zawka hlangkaitu a ni a, ala ni zel ang," tiin zirlai kalkhawmte chu nu leh pa leh zirtirtute thuawih turin a chah a. "Mihlawhtlingte hi Talent nei thate aiin zir taima leh tum ruh te an ni zawk thin," a ti.

MLA Robert Romawia Royte chuan Hnahthial MZP Hqrs in nachang hre taka an district huap zirlai tithate chawimawina an siam thin chu lawmawm tiin Hnahthial zirnaa thawhhlawk thin famta PC Vanlalrema hriatrengna Award a chhungten an donate chu hlu a tih thu a sawi a, MZP te ruahmanna sikul hrang hrangten tha taka an tawiawm chu tha a tih thu a sawi bawk.

He chawimawina pual hian Hnahthial district a HSLC a zirlai titha 10 te leh HSSLC Zirlai titha 12 te bakah HSLC eh HSSLC 100% a pass sikul 7 te chawimawina pek an ni.

Hnahthial MZP Hqrs te chuan MLA  Robert Romawia Royte pawh NECS hmanga Mizoram leh NE State danga hmasawnna hna a thawh that avang leh mahni sum senga Aizawl Football Club hmanga Mizo footballers tam tak chawisanga eizawnna a siamsak avangte leh Minister leh MLA anga thalaite hmasawnnana a hnathawhte avangin Chawimawina Thuchei an hlan a ni.

He hun hi C.Rodingliana, Vice President Hnahthial MZP in a kaihruai a, Hnahthial MZP Hqrs President Jimmy Lalrosanga leh MZP Gen Hqrs Vice President  C.Lalremruata te'n thu an sawi  bawk.